Dünyanın ən iri turizm portallarından sayılan “TripAdvisor” dünyanın ən yaxşı turizm istiqamətləri ilə bağlı reytinqin qaliblərini açıqlayıb.

Oxu.Az bu barədə “Daily Mail”ə istinadən xəbər verir.

Birinci yerdə Yaponiyanın o qədər də tanınmayan İsiqaki adası gəlir. Həmin ada “Top Destinations on the Rise” nominasiyası üzrə turistlər arasında ilin seçimi olub. İsiqaki füsunkar ağ çimərlikləri və sualtı qayaların zəngin fauna və florası ilə tanınır. Adıçəkilən ada, eyni zamanda, sörfinq, dayvinq və snorklinq üçün ən münasib məkanlardan hesab olunur. Adanın əsas incilərindən sayılan Manqrov meşələri və dağının yaratdığı füsunkar landşaft İsiqakidə istirahətin daha möhtəşəm keçəcəyini vəd edir.  

Reytinq cədvəlinə görə, ikinci yerdə Havay adalarında yerləşən Kapa kurortu gəlir. Kapa avarçəkmə və su xizəyi ilə məşğul olmağı sevənlər arasında kifayət qədər populyar məkanlardan sayılır.

Üçüncü yerdə isə Keniyanın paytaxtı Nayrobi qərarlaşıb. Adıçəkilən şəhər Afrikada safari üçün ən yaxşı məkanlardan hesab olunur. Turistlərə burada şəhərin gecə həyatı ilə tanış olmaq, Afrikanın izdihamlı bazarlarına və saysız-hesabsız ekzotik heyvanları olan bir neçə milli parka baş çəkmək imkanı yaradılır.

Bundan başqa, reytinqin ilk onluğunda Kanada, Polşa, Kosta-Rika, Latviya, Xorvatiya, İspaniya və Mərakeş kimi ölkələrin adları hallanır.